H1N1, preket nga virusi shkrimtarja Izabel Alende. Franca jep alarmin

Izabel Alende, shkrimtarja e njohur kiliane është prekur nga gripi i derrave. Lajmin e ka bërë të ditur vetë ajo për një të përditshme urguajane gjatë një interviste telefonike. E ndërkohë në rang botëror virusi H1N1 vazhdon të përhapet me ritme të paprecedente. Franca jep alarmin ndërsa përballet me 20 mijë raste të të prekurve me A(H1N1) në javë. Kjo shifër është shumë më e lartë nga parashikimet zyrtare.

Lajmi bëhet i ditur nga një agjenci jo qeveritare, e cila ka ndjekur situatën e krijuar në çdo rajon të Francës.Nga virusi H1N1 në Francë kanë humbur jetën 15 persona.

Alarmante është konsideruar gjendja dhe në Argjentinë ku për shkak të gripit të derrave në një javë kanë humbur jetën 47 persona. Sipas zyrtarëve të shëndetësisë në Buenos Aires deri tani gripi vdekjeprurës u ka marrë jetën 512 personave gjithsej duke e bërë kështu Argjentinën vendin e tretë në botë me vdekshmëri më të lartë nga virusi H1N1. Në nivel botëror viktimat kanë shkuar në 2837.